Бирдамлик – Барака омили

Инсоният тарихининг ҳар бир босқичида бирлашиш ва бирдамликнинг ўрни алоҳида аҳамият касб этган. Динимизда бирдамлик ва ўзаро ёрдам фақат ижтимоий муносабатларда эмас, балки руҳий камолотимиз учун ҳам зарур омил сифатида кўрсатилган. Аллоҳ таоло Қуръони Каримда ва Расули Акрам Муҳаммад соллаллоҳу алайҳи васаллам Ҳадиси шарифларида бирдамликни тарғиб қилган. Бирдамлик – Аллоҳнинг ризосига эришиш, дину диёнатимизни тўғри адо этиш ва инсонлар ўртасида тинчлик ва барака ҳукм суриши учун муҳим воситадир.

Аллоҳ таоло Қуръони Каримда бирдамликка алоҳида урғу берган ва мўминларни ўзаро ёрдамлашишга чақирган. Жумладан, Қуръони Каримнинг «Оли Имрон» сураси, 103-оятида шундай дейилади:

«وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا«

«Аллоҳнинг арқонидан маҳкам ушланглар ва бўлинманглар!»

Бу оятда Аллоҳ таоло мўминларни бирдамликка, диний асосларда бирлашишга чақирмоқда. Арқон сўзи бу ерда Аллоҳнинг динини англатади. Демак, Аллоҳ таоло мусулмонларни диний асосларда бирлашишга, ҳар қандай ажралиш ва низолардан узоқ туришга ундамоқда.

Бундан ташқари, «Анфал» сураси, 46-оятда ҳам Аллоҳ таоло бирдамликни сақлаш, ўзаро зиддиятларга йўл қўймаслик ҳақида шундай дейди:

«وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ ۖ وَاصْبِرُوا ۚ إِنَّ اللَّهَ مَعَ الصَّابِرِينَ«

«Аллоҳ ва Унинг Расули (буйруқлари)га итоат этинглар, низога борманглар, акс ҳолда ожиз қолурсизлар ва куч-қувватларингиз кетади.»

Бу оятда Аллоҳ таоло мусулмонларни ўзаро жанжал ва келишмовчиликлардан сақланишга, ҳар қандай можарони ҳал этишда Аллоҳ ва Унинг Расули кўрсатмаларига амал қилишга чақиради. Шундай бўлганида, жамият куч-қудратга тўлиб, тинчликда яшаши мумкин бўлади.

Пайғамбаримиз Муҳаммад соллаллоҳу алайҳи васаллам ҳам ўз умматларига бирдамликни тарғиб қилганлар. У зотнинг бир ҳадисларида шундай дейилган: «Мўминлар бир-бирларини севишда, меҳр-мурувватда ва шафқат кўрсатишда бир тананинг аъзоларига ўхшайди. Агар тананинг бир қисми оғриса, бошқа аъзолар ҳам уйқусизланиб, азоб чекади.» (Имом Бухорий ва Муслим ривояти).

Бу ҳадиси шариф бирдамликнинг нақадар муҳим эканлигини таъкидлайди. Мўминлар бир тананинг аъзолари каби бир-бирини қўллаши, ёрдам бериши кераклиги тушунтирилмоқда. Агар мусулмонлар ўзаро меҳр-мурувватда бўлиб, бир-бирларига ғамхўрлик қилмасалар, жамиятда тинчлик ва барака йўқолади.

Шунингдек, Пайғамбаримиз соллаллоҳу алайҳи васаллам бир сафар шундай деганлар: «Мўмин мўмин учун бинонинг қисмларига ўхшайди – бири бошқасини мустаҳкам тутиб туради.» (Имом Бухорий ва Муслим ривояти).

Бу ҳадиси шариф бирдамликнинг мўминлар орасидаги муносабатларни мустаҳкам қилиши кераклигини англатади. Бинонинг қисмлари бир-бирига боғланиб турмагунча, бино мустаҳкам турмайди. Шунингдек, мўминлар бир-бирларини қўллаб-қувватламасалар, жамият мустаҳкам бўлолмайди.

Бирдамликнинг натижаси сифатида жамиятда барака, хотиржамлик ва тинчлик ҳукм суради. Ўзаро бирдамликда яшаш – ҳар бир мусулмоннинг иймон амалларидан биридир. Аллоҳ таоло бир-бирини қўллаб-қувватлайдиган мусулмонларга ўзининг баракасини ато этади.

Расулуллоҳ соллаллоҳу алайҳи васаллам бир ҳадисларида: «Аллоҳнинг қўли жамоат билан биргадир.» (Имом Термизий ривояти)

Бу ҳадисда Аллоҳнинг ёрдами ва мадади жамоат билан эканлиги баён этилган. Ягона мақсад йўлида бирлашган мусулмонлар Аллоҳнинг ёрдамига эришадилар. Демак, бирдамликка эришилган жамиятда Аллоҳнинг ризоси ва баракаси бўлади.

Бирдамлик – жамиятда тинчлик ва баракани таъминловчи асосий омиллардан биридир. Қуръони Карим оятлари ва Ҳадиси шарифлар мусулмонларни ўзаро бирдамликка чақиради. Динга мувофиқ яшаш, бир-бирини қўллаб-қувватлаш, жамоат сифатида бирлашиш орқали биз Аллоҳнинг ризоси ва ёрдамини топамиз. Шундай экан, ҳар бир мусулмон бирдамлик ва ўзаро ёрдамлашув йўлини тутиши лозим. Аллоҳ таоло бизларни бирдамликда, баракада ва ризосига эришган бандаларидан қилсин.

 

Д.Отажонов

Қўшкўпир тумани “Шайх Абдулла” масжиди имом-хатиби

Leave a Reply

Ваш адрес email не будет опубликован. Обязательные поля помечены *