Она сути — буюк неъмат

Инсон ҳаётида она деган улуғ зотнинг ўрни беқиёсдир. Она нафақат фарзандини дунёга келтиради, балки уни меҳр ва муҳаббат билан тарбиялайди. Боланинг соғлом ўсиши ва камол топишида она сутининг аҳамияти жуда катта. Шунинг учун ҳам халқимиз азалдан она сутига муқаддас неъмат сифатида қараб келган.

Она сути — табиатнинг энг буюк мўъжизаларидан бири. У чақалоқ учун энг табиий ва фойдали озуқа ҳисобланади. Мутахассислар ҳам боланинг дастлабки ҳаётида она сутидан афзал озуқа йўқлигини таъкидлайдилар. Чунки она сутида чақалоқнинг ўсиши, иммунитети мустаҳкам бўлиши ва ақлий ривожланиши учун зарур бўлган барча витамин ва озуқа моддалари мавжуд. Чақалоқ туғилганидан сўнг унинг организми ташқи муҳитга мослаша бошлайди. Бу жараёнда она сути бола учун энг катта ҳимоя воситаси вазифасини бажаради. Она сути таркибидаги фойдали моддалар чақалоқ иммунитетини кучайтириб, уни турли касалликлардан асрайди.
Тиббиёт олимларининг фикрига кўра, она сути билан озиқланган болалар камроқ касал бўлади ва жисмонан бақувват ўсади. Айниқса, она сути чақалоқни шамоллаш, ичак касалликлари ва аллергия каби хасталиклардан ҳимоя қилишда муҳим аҳамиятга эга. Шунингдек, она сути боланинг мия фаолияти ва ақлий ривожланишига ҳам ижобий таъсир кўрсатади. Она сути билан улғайган болаларнинг фикрлаш қобилияти, хотираси ва диққати яхши ривожланиши кўплаб тадқиқотларда исботланган.

Она сути нафақат озуқа, балки меҳр ва муҳаббат манбаи ҳамдир. Болани эмизиш жараёнида она ва фарзанд ўртасида кучли руҳий яқинлик пайдо бўлади. Чақалоқ она бағрида ўзини хавфсиз ва хотиржам ҳис қилади.
Она меҳри боланинг руҳий тарбиясида муҳим ўрин тутади. Эмизиш жараёнида она фарзандига меҳр беради, уни эркалайди ва қалбида ишонч ҳиссини уйғотади. Бу эса боланинг келажакда меҳрибон, самимий ва руҳан барқарор инсон бўлиб улғайишига ёрдам беради.
Халқимизда “Она сути билан кирган хислат жон билан чиқади” деган нақл бор. Бу бежиз айтилмаган. Чунки бола она меҳрини ва тарбиясини илк бор айнан эмизиш даврида ҳис қилади.

Бугунги кунда турли сунъий озиқалар ишлаб чиқарилаётган бўлса-да, улар ҳеч қачон она сутининг ўрнини боса олмайди. Она сути доимо тоза, табиий ва бола организми учун мос ҳолда бўлади. У ҳеч қандай қўшимча тайёргарликни талаб этмайди. Бундан ташқари, она сути иқтисодий жиҳатдан ҳам жуда қулай. Ота-она ортиқча харажат қилмасдан, болани энг фойдали озуқа билан таъминлайди. Шу билан бирга, она сути билан озиқланган болалар соғлом бўлгани учун тиббий харажатлар ҳам камаяди.
Экологик жиҳатдан ҳам она сути энг мақбул танлов ҳисобланади. Чунки сунъий озиқалар ишлаб чиқаришда турли идишлар ва маҳсулотлар сарфланади, бу эса атроф-муҳитга таъсир кўрсатиши мумкин.

Она сутининг сифатли бўлиши аввало онанинг соғлиғи ва тўғри овқатланишига боғлиқ. Шунинг учун эмизикли аёллар витаминларга бой, фойдали ва табиий маҳсулотларни истеъмол қилишлари керак. Мева-сабзавотлар, сут маҳсулотлари, гўшт ва донли маҳсулотлар она организми учун жуда фойдали ҳисобланади. Она доимо руҳан хотиржам бўлиши, яхши дам олиши ва соғлом турмуш тарзига амал қилиши лозим. Чунки онанинг кайфияти ва саломатлиги болага ҳам таъсир қилади.

Шунингдек, шифокорлар чақалоқни камида олти ой фақат она сути билан боқишни тавсия этадилар. Бу давр боланинг иммунитети шаклланиши ва соғлом ўсиши учун жуда муҳим ҳисобланади. Она — ҳаёт манбаи, меҳр тимсоли. Шунинг учун жамиятимизда оналарга доимо юксак ҳурмат кўрсатилади. Она сути эса ана шу меҳр ва фидойиликнинг буюк рамзидир.
Фарзанд учун она меҳри ва дуосидан улуғ бойлик йўқ. Она фарзанди учун тунларни бедор ўтказади, унинг бахти ва соғлиғи учун жонини фидо қилишга тайёр туради. Шу боис ҳар бир фарзанд онасини қадрлаши, уни эҳтиром қилиши ва дуосини олиши керак. Она сути — Аллоҳ томонидан берилган буюк неъматдир. У чақалоқнинг соғлом ўсиши, ақлий ва жисмоний ривожланиши учун беқиёс аҳамиятга эга. Шу билан бирга, она сути она ва бола ўртасидаги меҳр ришталарини янада мустаҳкамлайди. Ҳар бир жамиятнинг келажаги соғлом авлодга боғлиқ. Соғлом авлодни тарбиялашда эса она сутининг ўрни беқиёсдир. Шунинг учун оналарни қадрлаш, уларнинг саломатлигига эътибор бериш ва она сутининг аҳамиятини кенг тарғиб қилиш барчамизнинг муҳим вазифамиздир.

М.Бобожонова

Хива шаҳар бош имом-хатибининг хотин-қизлар масалалари бўйича ўринбосари

Leave a Reply

Ваш адрес email не будет опубликован. Обязательные поля помечены *