ОТА-ОНАГА ҲУРМАТ — МИЛЛИЙ ҚАДРИЯТИМИЗ

Инсон ҳаётида ота-она ўрни беқиёсдир. Улар фарзандни дунёга келтирибгина қолмай, уни тарбиялаб, камолга етказади, тўғри йўл кўрсатади. Ота-онага ҳурмат, уларни эъзозлаш ва қадрлаш ўзбек халқининг азалий миллий қадриятларидан бири ҳисобланади. Асрлар давомида шаклланиб келган бу қадрият халқимиз маънавияти, урф-одат ва анъаналарида мустаҳкам ўрин эгаллаб келмоқда. Бугунги кунда ҳам ёш авлод онгу шуурига ота-онага ҳурмат туйғусини сингдириш муҳим вазифалардан биридир.

Ота-онанинг фарзанд ҳаётидаги ўрни. Ота-она — инсон учун энг яқин, энг меҳрибон ва энг ишончли суянчдир. Фарзанднинг биринчи устози, биринчи тарбиячиси айнан ота-она ҳисобланади. Боланинг дунёқараши, хулқи, одоби ва маънавий қиёфаси аввало оилада шаклланади. Ота-она фарзандга нафақат билим, балки ҳаётий тажриба, инсоний фазилатлар — меҳр-шафқат, сабр-тоқат, ҳалоллик ва масъулият ҳиссини ўргатади. Она меҳри беқиёс бўлиб, у фарзанди учун тунларни бедор ўтказади, унинг бахти ва саломатлигини ўз ҳаётидан устун қўяди. Ота эса оила таянчи, фарзанд учун ибрат намунасидир. У меҳнат қилиб, оиласини боқади, фарзандига ҳаётда мустақил бўлишни, қийинчиликларга бардош беришни ўргатади. Ана шу сабабли ота-онани ҳурмат қилиш, уларнинг меҳнатини қадрлаш ҳар бир фарзанднинг муқаддас бурчидир.

Миллий қадриятларимизда ота-онага ҳурмат. Ўзбек халқининг урф-одат ва анъаналарида ота-онага ҳурмат алоҳида ўрин тутади. “Ота рози — Худо рози”, “Она дуоси — фарзандга паноҳ” каби мақоллар халқимиз онгида чуқур илдиз отган. Бу мақоллар орқали ота-онанинг дуоси, розилиги инсон ҳаётида қанчалик муҳим экани уқтирилади. Қадимдан ота-онани улуғлаш, уларнинг сўзини икки қилмаслик, кексайган чоғида ғамхўрлик қилиш миллий қадрият сифатида қараб келинган. Оилада катталарга ҳурмат, кичикларга иззат кўрсатиш тамойили авлоддан-авлодга ўтиб келмоқда. Бу эса жамиятда меҳр-оқибат, ўзаро ҳурмат ва бирдамликни таъминлайди. Бугунги глобаллашув даврида турли маданиятлар таъсири кучайиб бормоқда. Айрим ҳолатларда ёшлар орасида ота-онага бўлган муносабатда бепарволик, эътиборсизлик кузатилиши мумкин. Интернет ва ижтимоий тармоқларга ортиқча берилиш, моддий манфаатни устун қўйиш каби омиллар миллий қадриятлар заифлашувига сабаб бўлаётгани сир эмас.

Шунинг учун ёшларни миллий руҳда тарбиялаш, ота-онага ҳурмат туйғусини мустаҳкамлаш ҳар қачонгидан ҳам долзарбдир. Мактаб, оила ва жамият ҳамкорликда иш олиб бориб, ёш авлодга ота-онанинг қадрини англатиши лозим. Чунки ота-онага ҳурматли бўлган инсон жамиятда ҳам масъулиятли, инсофли ва маънавиятли шахс бўлиб етишади. Ота-онага ҳурмат қилган фарзанд ҳаётда баракани ҳис қилади. Унинг ишлари юришқоқ бўлади, чунки ота-онанинг дуоси уни доимо қўллаб-қувватлайди. Бундай инсон атрофдагилар орасида ҳам ҳурмат қозонади, чунки у инсоний фазилатларга эга бўлади. Аксинча, ота-онани ранжитган, уларга беэътибор бўлган инсон кўпинча маънавий бўшлиқни ҳис қилади. Шу боис ота-онанинг розилигини олиш, уларга меҳр ва ғамхўрлик кўрсатиш ҳар бир фарзанд учун ҳаётий қоидага айланиши керак. Хулоса қилиб айтганда, ота-онага ҳурмат — бу нафақат инсонлик бурчи, балки халқимизга хос юксак миллий қадриятдир. Ота-онани эъзозлаш, уларнинг меҳнатини қадрлаш, дуосини олиш ҳар бир фарзанднинг муқаддас вазифасидир. Бу қадриятни асраб-авайлаш, уни ёш авлод онгига сингдириш орқали биз маънавий баркамол, келажак учун масъулиятли авлодни тарбиялаймиз. Ота-онага ҳурмат бор жойда меҳр-оқибат, тинчлик ва барака бўлади.

Ф.Отажанова  

Хоразм вилоят бош имом-хатибининг хотин-қизлар масалалари бўйича ўринбосари

Leave a Reply

Ваш адрес email не будет опубликован. Обязательные поля помечены *