АДАШГАН ОҚИМЛАРНИНГ МАНҚУРТ ҒОЯЛАРИ

Бугунги кунда дунёнинг турли бурчакларидан ҳар хил номлар билан чиқаётган оқимлар, гуруҳлар ислом динига ҳар хил ўзгаришлар, қўшимчалар қўшиб айниқса ёшларни тўғри йўлдан адаштирмоқдалар. Қуръон оятлари ва хадисларга мурожаат этадиган бўлсак: «Бугун сизларга динингизни комил қилдим, неъматимни бенуқсон, тўкис қилиб бердим ва сизлар учун Исломни дин қилиб танладим …»

( Моида-3 оят) Шунга қарамай айрим адашган оқимлар ўз ғоя ва мақсадлари йўлида Ислом таълимотига ўзгартириш ва янгиликлар киритишга уринмоқда. Улар ўзларининг ғаразли ниятларини амалга ошириш учун дин ҳукми ва арконларига янгилик киритиб, жумладан, шундай ёзадилар:  “Халифаликни тиклаш мусулмонлар зиммасига Аллоҳ таоло фарз қилган энг муҳим амаллардандир”. Бу амал мукаммал Ислом динига ёт ҳукм, янгилик киритишдир. Исломга янгилик киритиш бидъат бўлиб, бу ҳақда Мухаммад соллаллоҳу алайҳи васаллам шундай деганлар: ”Сизларнинг орангиздан (диндаги) ишларга янгилик киритувчилар чиқади.(Билингки, диндаги) ҳар бир янгилик бидъат ва ҳар бир бидъат-залолатдир. Залолат эса жаҳаннамга етаклайди”. Динга янгилик киритишини оқибати нима бўлишини  “ИШИД” (Ироқ Шом Ислом давлати) олиб бораётган харакатларидан очиқ-ойдин билиб олса бўлади. Бундай  нотўғри, носоғлом ақидаларга эргашиш мусулмон кишининг охиратини куйдириш билан бирга жамият тинчлиги-осойишталигига раҳна солади. Юртимизда мустақилликнинг дастлабки кунлариданоқ, мамлакат ахолисининг маънавий эҳтиёжларидан келиб чиқиб, ислом дини равнақига кенг йўл очиб берилди.   Ислом динига бўлган муносабат тубдан ўзгарди. Ўлкамизда халқимиз рухига мос келадиган имон-эътиқод, адлу инсоф, диёнат, меҳру оқибат, ор-номус, иффат ва ҳаё каби эзгу фазилатлар ўз аксини топди. Айрим адашган гуруҳлар ўзларига Аллоҳ таолонинг каломи бўлмиш Қуръони Каримдаги: «Ораларингиздан яхшиликка (исломга) даъват қиладиган, ибодатга буюрадиган ва исён-гуноҳлардан қайтарадиган бир жамоа бўлсин…» (Оли Имрон сураси, 104-оят). деган сўзларини ҳужжат қилиб келтирадилар.

Инсонларни яхшиликка даъват қиладиган, гуноҳлардан қайтарадиган бир гуруҳ , яъни оқимнинг вужудга келишини фарз бўлишига далил қилиб олади. Юқорида зикр қилинган оятга буюк ислом алломаларининг асарларидаги берилган шарҳларнинг бирортасида ҳам махсус гуруҳ тузишга ишора мавжуд эмас. Агар мазкур оят хақиқатан ҳам ушбу оқимларга ўхшаш бирор ташкилотни тузишни тақозо қилганда эди, бундай оқимлардан олдинроқ, балким, Расулуллоҳ соллаллоҳу алайҳи васаллам ўз хадисларида мақтаган даврида, яъни, сахобалар ёки тобеинлар даврида тузилган бўлар эди. Демак, салаф уламолари ҳам, ундан кейин ўтган ва ҳозирги замон уламолари ҳам бундай йўлларга қаршидирлар. Шунинг учун ҳам бундай оқимларнинг ғоясини  бирорта мамлакатда маъқулланиб, расмий ташкилот сифатида тан олинмади. Исломда эса озчилик фикрига эмас, кўпчилик фикрига қўшилишга буюрилган. Бунга ушбу сахих ҳадис далилдир: “ Менинг умматим ёппасига адашиб, залолатга тушиб қолмайди. Қачонки улар орасида қарама-қаршиликни кўрсаларингиз, сизлар кўпчилик томонда бўлингиз!”. Демак, Пайғамбаримиз соллаллоҳу алайҳи васалламнинг ушбу васиятларига замонамиз мусулмонлари озчилик овозга эга бўлиб турган оқимларга эмас, уларнинг фикри ва ғоясига қўшилмай келаётган кўпчилик уламоларнинг сафига қўшилишлари керак бўлади.

Аллоҳ таоло Қуръони-каримнинг Оли-Имрон сураси, 103-оятида мусулмонларни иттифоқликка буюриб шундай баён қилган. «Ҳаммаларингиз  Аллоҳнинг “арқони” ни (Қуръонини) маҳкам тутинг ва фирқаларга бўлинманг…..». Биз бу оятдаги “бўлинманглар” деган буйруқни Ислом номини ниқоб қилиб олган биронта гуруҳ ёки оқимга кирманглар деб тушунамиз. Биз алоҳида хизбмиз, алоҳида бир гуруҳмиз дер эканлар уларнинг ҳар бири Аллоҳнинг “фирқаларга бўлинманглар” деган буйруғига қарши  чиқиш бўлади. Пайғамбаримиз соллаллоҳу алайҳи васаллам 14-аср муқаддам “ Мени умматларим 73-фирқага бўлиниб кетади. Уларнинг ҳаммаси дўзахи бўлади, фақат бир тоифасигина жаннати бўлади”,- деган эдилар. Ўша дўзах азобидан нажот топгучи тоифа қайси деб сўралганда “Мен ва сахобаларимнинг йўлини ушлаганлар”,-деганлар. Шундай экан, азизлар, иймон-эътиқодимизга раҳна соладиган, фарзандларни ота-оналаридан жудо қилишга олиб борадиган, дин учун курашаман дея, динга қарши курашадиган ғоя соҳибларининг пуч даъволарига учмайлик, муқаддас динимизни, эътиқодимизни улардан ҳимоя қилайлик.

А.Бобоев

Шовот тумани “Ваянган бобо” масжиди имом-хатиби

Leave a Reply

Ваш адрес email не будет опубликован. Обязательные поля помечены *